jueves, 19 de febrero de 2015

Xuntanza coa AV de San Pedro A Xuntanza



REPRESENTANTES DE ESQUERDA UNIDA COMPOSTELA REÚNENSE COA A.V. A XUNTANZA PARA A ELABORACIÓN COLECTIVA DO PROGRAMA POLÍTICO DAS MUNICIPAIS

O CONSELLO COMARCAL DE EU COMPOSTELA REITERA A NECESIDADE DE ARTICULAR OS MECANISMOS DE INFORMACIÓN E PARTICIPACIÓN, PARA QUE AS VECIÑAS E VECIÑOS SEXAN PARTÍCIPES Á HORA DE BUSCAR SOLUCIÓNS PARA O SEU BARRIO.

Os representantes do Consello Comarcal de Esquerda Unida Compostela, José María Tubío e Vicente Vázquez, mantiveron un encontro coa AV A Xuntanza, dentro do programa de visitas ao tecido asociativo da cidade para coñecer de primeira man as necesidades do barrio e no proceso participativo de elaboración colectiva do programa das municipais de maio do 2015 .

Consideramos labor prioritaria do Concello fomentar a participación da veciñanza nas actividades que incumban ao seu barrio e establecer espazos e instrumentos para os procesos de reclamacións e suxestións.

Dende o Consello Comarcal de EU Compostela apoiamos a demanda dun Centro Socio Cultural no barrio de San Pedro. É necesaria a construción dun espazo publico con salón de actos e outras salas habilitadas para dar servizo ás diferentes actividades do barrio. Reiteramos tamén o noso apoio á proposta de converter o CSC da Trisca nun lugar destinado ás persoais maiores contribuíndo a que teñan unha vida autónoma e enriquecedora.

Compartimos que, para San Pedro e para o resto da cidade, é prioritario e urxente a elaboración dun Plan Global de Mobilidade Sustentable económica e medio ambiental. A realización de obras non pode ser improvisada, cómpre elaborar un proxecto colectivo,  no que se analice, entre outros temas, o transito de vehículos da cidade.

Dende Esquerda Unida defendemos que se poñan en marcha ferramentas de democracia participativa para acadar, entre outros asuntos, un proxecto sustentable que mellore a mobilidade da nosa cidade e o seu mantemento. A  participación cidadá ten que ser real e efectiva, a veciñanza ten dereito á información do que sucede na súa cidade e a ser partícipe na toma de decisións. Por iso apoiamos que as  distintas AVV dispoñan dunha persoa que as represente nas comisións do Plan Especial. O sucedido coa Casa de Xuventude é a mostra de que o actual goberno municipal nin informa, nin establece mecanismos para a participación das veciñas e veciños.  

Hoxe máis que nunca é necesario mudar drasticamente os mecanismos de participación que rexen no noso concello. A Democracia é  moito máis que acudir a votar cada catro anos.

No hay comentarios: