Normalización lingüística

O CONSELLO COMARCAL DE EU COMPOSTELA CRITICA QUE O CONCELLO NON DÉ BO USO DO GALEGO NAS ACTIVIDADES NAS QUE COLABORA

EU COMPOSTELA DEMANDA QUE SE CREE UN PLAN DE NORMALIZACIÓN LINGÜÍSTICA ADECUADO AO CONTEXTO ACTUAL

Para O Consello Comarcal de Esquerda Unida Compostela a defensa do galego, é e será sempre primordial, buscando así a súa correcta normalización.

Por desgraza, a realidade do galego é completamente a contraria da que esta organización desexara. O idioma galego cada día retrocede en número de falantes, debido aos diferentes estereotipos que o envolven e ás malas ou inexistentes políticas de normalización da Xunta de Galicia.

En realidade, parece que as políticas que se impulsan son para prexudicar ao galego, e a exemplos como o Decreto do Plurilingüísmo da Xunta, ou que a USC, na cal segundo datos do 'Cartafol Dixital' só o 23% das aulas é na nosa lingua, siga cun Plan de Normalización Lingüística que rematou no 2010, podemos sumar accións como a do Concello de Compostela, o cal non se molesta en usar o galego para as súas actividades.

Desta maneira, o Concello de Santiago está a colaborar coa iniciativa “Lánzate”, un concurso de novos emprendendores, para o cal se levou a cabo a creación de trípticos informativos, pero iso si, en castelán.

O Concello, ademais de financiar un proxecto do Centro Comercial privado As Cancelas con cartos públicos, está a facelo en castelán, sendo unha vergoña ambas realidades. Desta maneira, o goberno local segue coa súa liña de traballo de mala xestión e ataque á cultura.

O Consello Comarcal de Esquerda Unida Compostela denuncia estes feitos e pide ao Concello de que, ademais de dar explicacións polo sucedido, se valore a posibilidade de crear un Plan de Normalización Lingüística local ou un protocolo de uso lingüístico para as actividades organizadas polo Concello ou que este apoie, sendo o uso do galego un dos eixes primordiais do mesmo. Ademais, O Consello Comarcal demanda coñecer os cartos públicos investidos neste concurso.