Priorizar uso diñeiro público

O CONSELLO COMARCAL DE ESQUERDA UNIDA COMPOSTELA ESIXE QUE SE PRIORICEN OS INVESTIMENTOS  OU OS GASTOS NO CONCELLO, CONSIDERANDO URXENTE APLICAR AS POLÍTICAS SOCIAIS QUE DEMANDA A CIDADANÍA

O CONSELLO COMARCAL  DE EU COMPOSTELA CREE NECESARIO, POR SUPOSTO, MANTER EN BOAS CONDICIÓNS OS ESPAZOS PÚBLICOS DA CIDADE PERO SEN REALIZAR GASTOS SUPERFLUOS.

O Consello Comarcal de Esquerda Unida Compostela demanda que o Concello, como servizo público que é, leve a cabo a súa labor e, tralo pertinente debate e participación cidadá, poña en marcha as políticas sociais que as veciñas e veciños necesitan.

Consideramos máis que evidente, tras reunirnos con diferentes organizacións, como por exemplo a Cociña Económica ou o Albergue de Xoán XXIII, que Santiago precisa un Concello que actúe para solucionar os problemas desta crise-estafa que padecemos a maioría social. Por iso, entre outras medidas, pedimos a creación dun Servizo Municipal de Atención Integral a Persoas sen Fogar ou o Teléfono de Emerxencias Sociais e o Censo Voluntario de Persoas en Risco de Exclusión Social.

O Consello Comarcal de EU Compostela sempre, pero máis agora nesta crise-estafa que padecemos, esixe que a inversión ou gasto do diñeiro público do Concello debe priorizarse en actuacións que beneficien a maioría social.

Por tal motivo, neste momento, non consideramos oportuno que o Partido Popular gaste 124.145 euros en remodelar a Praza de Galicia que deberían ser investidos en aplicar políticas sociais.

Dende o Consello Comarcal de EU Compostela tamén  desexamos mostrar as nosas reticencias a esta obra na Praza de Galicia, posto que, nin moito menos, a consideramos o mellor lugar para albergar un parque infantil, e tamén porque temos as nosas dúbidas de que a caseta instalada nesta praza, de escasísimo uso na actualidade, vaia a  telo na nova localización prevista detrás do Parlamento, esta situación debería mudar e porse ao servizo das compostelás e composteláns .

Por suposto, tal e como manifestamos despois de reunirnos coa AVV Raigame do Ensanche, consideramos necesario un plan de actuación na Praza de Vigo que acometa as obras necesarias de mellora que este espazo público necesita, pero unha cousa é o necesario mantemento dun espazo público e outra ben distinta é o gasto, neste momento, de 123.479 euros nun parque infantil, tendo o parque infantil Agros de Ramírez tan próximo.

Dende o Consello Comarcal de EU Compostela reiteramos que apoiamos o mantemento de espazos públicos na cidade, pero reiteramos que o Concello sempre debe priorizar o uso do diñeiro público, sendo necesario neste momento o investimento en políticas sociais que busquen unha sociedade xusta e igualitaria.